Dibana nababuki zindwendwe baseFlorida abaye bamkela abantu ababaleke kwinkanyamba

Amakhaya Oncedo ngoku nguAirbnb.org

Inkqubo ka-Airbnb Yamakhaya Oncedo itshintshile yanguAirbnb.org, umbutho ongenzi nzuzo omtsha kraca oyi-501(c)(3). Enkosi ngokwenza nathi intsapho Yamakhaya Oncedo. Sikuvuyela kakhulu ukuba ube yinxalenye yesi siqalo sitsha.

Xa uJason noKaren bohlukaniswa Yinkanyamba uMichael, ababuki zindwendwe Bamakhaya Oncedo uBob noJuan bayinceda le ntsapho yabuyelana.

Ngo-Okthobha 2018, emva kokuba isiphango saye sisiba sibi saphela siyinkanyamba ekwiNqanaba le-5 eyafikela iFlorida Panhandle, uJason noKaren bathatha abantwana babo baza babalekela eOrlando.

“Njengabantu baseFlorida, sinenkani xa kuthethwa ngeenkanyamba," utsho njalo uJason, onosapho oluhlala eFort Walton Beach, ekwiimayile ezintathu ukusuka elunxwemeni. “Asenzi nto ngazo ngaphandle kokuba zinamandla eNqanaba le-3 okanye le-4. Kodwa ithe le xa ifikelela Kwinqanaba le-5, kwavele kwazicacela. Sagqiba kwelokuba sihambe.”

UKaren, ofundisa umdlalo weqonga kwisikolo samabanga aphakamileyo sasekuhlaleni uthi, “Bazivala iintsuku ezimbini izikolo, nto leyo engaqhelekanga.” “Sazi ngelo xesha ukuba kwakenzeke into enkulu. Ibe besifuna ukuba kunye, ukuba kunokwenzeka intlekele enkulu.”

Inkanyamba uMichael yafika kumbindi waseFlorida nomoya awawuvuthuza iikhilomitha eziyi-150 ngeyure—uwisa amaphahla ezindlu, uzalisa iindlela ngamanzi olwandle, uwisa iipali zemibane ibe ibeka engozini bonke abantu basekuhlaleni. Ngelo xesha, uJason wayekwindawo ekude ngeeyure eziyi-10 kuhambo lwezoshishino, ibe uKaren wayesekhaya noonyana babo ababini. Le ntsapho yakhawuleza yaqonda ukuba iindawo zokuhlala ezikufuphi zizele kwaye iihotele zibiza kakhulu.

UJason uthi, “Ndaye ndajonga ii-app zam zeehotele ndaza ndabona ukuba zazibhukishwa ngokukhawuleza, ibe amaxabiso ayesonyuka kakhulu, ngoko ndavula i-app yam ka-Airbnb. Ngoku, ukujonga uAirbnb ngaphambi kokujonga iihotele yinxalenye yeplani yethu yokufuduka. Awufuni ukuba sezindleleni uzama ukubaleka ngoxa kufika isaqhwithi. Okukhona ulinda ixesha elide, kokukhona abantu bethatha isigqibo sokufuduka.”

Wavula i-app yakwa-Airbnb kwifowuni yakhe, wabe umyalezo ubuza enoba yena okanye intsapho yakhe ichatshazelwe na yinkanyamba. Kulapho wawafumanisa khona Amakhaya Oncedo, inkqubo edibanisa abantu abachatshazelwe zintlekele neendawo zokuhlala zasimahla. Indlu awayifumanayo—enamagumbi okulala amathathu, namagumbi okuhlambela amathathu—bekungeneka kuyo ngemoto ibe ikwindawo efanelekileyo ukuze intsapho iphinde idibane.

UJason noKaren badibana kuAirbnb wabo kumbindi weFlorida, kumazantsi eOrlando—indawo ethandwa ngokukhethekileyo ngenxa yokuba kufuphi kwayo neDisney World. Le ndawo ekwenza ubethwe ngumoya, nehonjiswe ngesitayile sezindlu ezingaselwandle—inefenitshala enemibala emihle neendonga ezinemibala ethe qhaka.

Abayeni uBob noJuan baqala ukuvula ikhaya labo kule nkqubo ngo-2016, ibe ukususela ngoko baye bahlalisa iintsapho eziliqela ezichaphazelwe Zinkanyamba uIrma noMichael. Esi sibini sele sineminyaka esixhenxe sitshatile kwaye sindawonye iminyaka engaphezu kweshumi; uBob udla umhlala-phantsi kwaye ulawula izindlu zabo, ibe kutshanje uJuan usandula ukuqalisa ishishini lohambo elijolise kubantu beeLGBT lokuya e-Ecuador. Ukuza kuthi ga ngoku, babuke iindwendwe ezingaphezu kweziyi-2 000 ezivela kumazwe angaphezu kwe-35.

UKaren uthi, “Xa safika apho, savakalelwa ngathi likhaya elikude nekhaya. Ewe kona sasixhalabe kakhulu ngekhaya lethu, kodwa kwakumnandi ukothulwa loo mthwalo emagxeni ethu. Kwandothusa ngendlela emnandi ukuba khona kwepuli.”

Kangangeentsuku ezintathu, le ntsapho yaphumla, yakhokha amandla, yaza yamamela iindaba ngoxa isaqhwithi sasisiya siqatsela. UJason uthi, “kwimeko eyenza isitresi, saziva sikhathalelwe. Kusetyenziswa i-app, nalapha ezintweni.”

Nangona uBob noJuan babesekhaya eFort Lauderdale, babesakwazi ukunceda nangona bekude. UJuan wayesoloko eqhakamshelana noJason ibe wayedla ngokujonga ukuba intsapho yakhe iqhuba njani. “Xa uneendwendwe endlini yakho, uyazixhalabela,” utsho uBob, “Nokuba zibaleka iimeko ezimbi kakhulu, uhlala ucinga usithi: Ndiyathemba ukuba akukho nto imbi ibehlelayo.”

Ngokuqhelekileyo, uJason noKaren baye balungiselele inkanyamba ngokugcina ukutya okungaboliyo baze bazalise ibhafu yabo ngomkhenkce nangamanzi ongezelelekileyo. UKaren uthi, “Ukuba ulinda de kube lusuku lwaxa wonke umntu esiya ezivenkileni, uza kufika iishelfu zingenanto. Sigcina iibhetri, iithotshi neetshaja ezitshaja ibhetri ngokujijwa ngesandla ukwenzela iifowuni zethu xa umbane unokucima.”

UJuan noBob balungiselela ukwamkela intsapho kaJason noKaren kanye ngendlela ebebenokwenza ngayo kulo naluphi na olunye undwendwe luka-Airbnb. UJuan uthi, “xa sihamba, sonke sifuna ukufumana indawo apho sinokuziva sisekhaya,” ebonisa ukuba balindele into efanayo nangoku. “Indawo ecocekileyo, apho uziva wamkelekile, noza kukhuseleka kuyo.”

Bathi uJason noKaren bakubuyela kwindlu yabo ngasekupheleni kwaloo veki, bafika kungekho monakalo ungako, kodwa abantu abaninzi elumelwaneni babengenalo elo thamsanqa. UJason uthi, “Kuza kuthatha iminyaka emininzi ukulungisa izinto nokuphinda kwakhiwe kwakhona. Iindaba azisathethi ngayo ngoku, kodwa kusekho abantu abadilikelwa zizindlu zabo kwaye bahlala ezintenteni ePanama City." Ubuncinane ngabantu abayi-36 abasweleke ngenxa yeNkanyamba uMichael, eyona nkanyamba yakha yenza umonakalo omkhulu kule ngingqi ukususela ngo-1992.

UJuan uthi, “Kukho into eyonwabisayo ngokunceda umntu ungalindelanga kufumana nto kuye. UJason wayemane ecela ukusibhatala kodwa sathi kuye: Akukho mfuneko yaloo nto. Siyazi ukuba awunandawo yokuhlala ibe siyakuvuyela ukunceda.”

“Ukuba kunokuze kwenzeke sibe sezihlangwini zabo, kube kusiza inkanyamba,” uthi, “kungaba mnandi ukwazi ukuba singaya Kumakhaya Oncedo.”

Inkcazelo ekweli nqaku isenokuba itshintshile emva kokuba lipapashiwe.