Ezona zinto zinokusetyenziswa onokunikezela ngazo ngoku

Ngokwenkcazelo ka-Airbnb entsha,* iindwendwe zidla ngokuhluza iziphumo zazo ukuze zifumane izinto ezinokusetyenziswa eziyi-10 eziphambili. Ukuba unazo naziphi na kwezi zinto zinokusetyenziswa zithandwayo, qinisekisa ukuba uzifaka kwindlu yakho ukuze iindwendwe zikufumane xa zikhangela.

Ikhaya kude nekhaya
Iziphumo zokukhangela kweendwendwe emhlabeni wonke zibonisa ukuba izinto ezinokusetyenziswa eziyi-10 eziphambili ezifunwa zindwendwe ngoku zezi:

1. Ipuli
2. I-wifi
3. Ikhitshi
4. Indawo yokupaka yasimahla
5. I-jacuzzi
6. Umatshini wokuhlamba okanye owokomisa impahla
7. Umatshini okhupha umoya obandayo okanye oshushu okanye isixhobo sokufudumeza indlu
8. Ukuzingenela
9. Indawo ezinokuhlala kuyo zisebenzise ilaptop
10. Ukuvunyelwa kwezilwanyana zasekhaya

Nazi izinto onokuzenza ukuze uqinisekise ukuba ezinye zezi zinto zinokusetyenziswa zizilungele kangangoko kunokwenzeka iindwendwe:

• I-wifi: Qinisekisa ukuba iyasebenza nokuba iindwendwe ziyayazi indlela yokungena kuyo. Cinga ngokubeka uphawu olunemiyalelo eluncedo oluneplastiki eqinileyo nekulula ukulucoca kwindawo ekwindlu yakho.
• Umatshini okhupha umoya oshushu okanye obandayo: Siyayazi ukuba umoya oshushu okanye obandayo ofikelela indlu yonke awuqhelekanga kwezinye iingingqi. Ukuba unawo, zichazele iindwendwe ukuba zingayifumana phi into yokuwulawula nendlela yokuwusebenzisa—nalapha uphawu olunemiyalelo oluneplastiki eqinileyo lunokunceda. Ukuba awunawo, cinga ngokufaka ekunokujikelezwa nawo ngeenyanga ezishushu zehlobo.
• Ikhitshi: Iindwendwe zisenokufuna ukuziphekela ngexesha lokuhlala kwazo, ngoko qinisekisa ukuba uzinika izitya, iimbiza neepani nezinto zokupheka. Kuhle ukuzichaza ezi zinto kwingcaciso yendlu yakho.
• Indawo yokupaka: Ukuba unendawo yokupaka iindwendwe, ungalibali ukuzinika imiyalelo ngaphambi kokuba zifike uze ungalibali nokukhetha indawo yokupaka njengento enokusetyenziswa ekwindlu yakho.

Iindawo eziphandle
Iindwendwe ezininzi zifuna ukuhlala kwiindawo ezinezinto zokwenza phandle. Ukuba ingingqi yakho ineendawo ezintle zokunyuka intaba okanye ezinye izinto ezenziwa phandle, chazela iindwendwe ngazo kwincwadi yakho ebonisa iindawo okanye incwadi ezixelela ngendlu.

Enye indlela yokuzinceda zonwabe zibethwa ngumoya ohlaziyayo kukuphucula iindawo eziphandle zendlu yakho. Gcina ingca nemithi ilungiswe kakuhle uze ucinge ngokufaka (okanye ukulungisa) ezi zinto zinokusetyenziswa zilandelayo:

• Ifenitshala yeveranda
• Into yokoja
• Iimagi neepleyithi zaphandle
• Imidlalo nezinye izinto zokuzonwabisa

Izinto zokucoca
Iindwendwe ezininzi ziza kukuvuyela ukufumana ithuba lokugcina izinto zicocekile. Kuhle ukufaka ezi zinto:

• Amaphepha okosula izandla
• Iiglavu ezilahlwayo
• Into yokucoca iindawo ezininzi
• Amalaphu okanye ispreyi sokubulala iintsholongwane
• Into yokunciphisa iintsholongwane yezandla
• Isepha yokuhlamba izandla

Iintsapho ezinabantwana
Unokunceda abazali abanabantwana abancinci bazive bekhululekile kwindawo yakho ngokufaka ezinye zezinto abazidinga kakhulu, njengezi:

• Ibhedi yosana
• Izitulo zokutyisela usana
• Iigeyithi zosana
• Imagi, ipleyithi namacephe abantwana
• Itafile yokutshintshela usana
• Izinto zokulubona usana nokuba uphi endlini
• Izinto zokogquma iiplagi

Kufuneka uqinisekise nokuba unezinto ezifunekayo ezaneleyo, ezifana nezi:

• Isepha
• Ishampu
• Iphepha langasese
• Izinto zebhedi neetawuli ezongezelelekileyo

Funda okungakumbi ngokubuka iindwendwe ezihamba nosapho

Abantu abenezilwanyana zasekhaya
Iindwendwe ezininzi zifuna ukuza nezilwanyana zazo zasekhaya kuhambo lwazo. Siyayazi ukuba abanye Ababuki Zindwendwe abakwazi ukuba neendawo ezilungele izilwanyana zasekhaya. Kodwa ukuba unako, ngoku lixesha elihle lokwenza loo nto.

Iindwendwe ezihamba nezilwanyana zasekhaya zisenokufuna ukwazi ukuba zingalindela ntoni kwindawo yakho, njengokuba uneyadi ebiyelweyo okanye iveranda yakho wedwa. Usenokufaka nezinto ezinokusetyenziswa ezilungele izilwanyana zasekhaya ezifana nezi:

• Izitya zokutya namanzi
• Izinto zokogquma ifenitshala
• Iitawuli ezilungiselelwe ukosula iinyawo zezilwanyana zasekhaya emnyango
• Izinto zokucoca ezingakumbi

Kungakuhle nokulungisa imithetho yakho yekhaya. Ungachazela iindwendwe izinto ezifana nokuba zingaphi izilwanyana ezivumelekileyo kwindawo yakho, zeziphi iintlobo zezilwanyana zasekhaya ozamkelayo nokuba akukho ngxaki na ukushiya isilwanyana sasekhaya singahoywanga mntu kwindawo yakho.

Funda okungakumbi ngokubuka iindwendwe ezinezilwanyana zasekhaya

Abantu abasebenzela ekhaya
Abantu abaninzi baqhubeka besebenzela esekhaya ibe basenokugqiba ekubeni basebenze ngoxa bekuhambo. Ungabanceda baqhubeke besebenza kakuhle ngokuquka ezi zinto zinokusetyenziswa zilandelayo:

• I-wifi ekhawulezayo: Iindwendwe zilindele i-wifi esebenza ngokukhawuleza ngakumbi ngoku ekubeni ezinye zisebenzela ekhaya. Ungavavanya isantya se-wifi yakho usebenzisa i-app yakho ka-Airbnb—kwaye, ukuba iziphumo zakho zibonisa ukuba inesantya esiphantsi, cinga ngokuyiphucula ibe yekhawulezayo.
• Indawo onokuhlala kuyo usebenzise ilaptop Khangela idesika okanye itafile ngakwindawo eneplagi yombane nesitulo esitofotofo (kuhle ngakumbi ukuba senzelwe ukuhlalisa kakuhle xa usebenza). Ufuna ukwenza okungakumbi? Faka ne-stapler, amaphetshana ahlukeneyo okubhala nemagi egcwele iipeni ezintsha. Ukuba unomatshini wokuprinta okanye wokwenza iikopi, qinisekisa ukuba uyaziphawula ezo zinto kwingcaciso yendlu yakho.
• Umatshini wokwenza ikofu neketile yeti: Ezi ndwendwe ziza kukuvuyela ukufumana uncedo lokuzipha amandla ebudeni bemini zazo ezixakekileyo.
Funda indlela yokufaka izinto ezinokusetyenziswa ezintsha

Ungalibali ukuveza izinto ozitshintshileyo ngokulungisa izinto zakho ezinokusetyenziswa, ingcaciso yendlu neefoto. Ukufaka nje izinto ezimbalwa ezifunwayo kunodlala indima enkulu ekwenzeni iindwendwe zizive zikhululekile ngakumbi kwindawo yakho—ibe kunokuphumela kuluvo oluhle kakhulu.

*Ngokusekelwe kwinkcazelo ka-Airbnb ebale ezona zinto zinokusetyenziswa zikhangelwa kakhulu emhlabeni wonke ukususela nge-1 kaJanuwari ukuya kwi-31 kaDisemba2021.

Inkcazelo ekweli nqaku isenokuba itshintshile emva kokuba lipapashiwe.