Izinto ekufuneka uzazi ngokuzikhusela kumsi otyhefayo

Siyayazi ukuba ukuhoye kakhulu ukonwaba nokhuseleko lweendwendwe zakho. Nangona zininzi izinto ezibalulekileyo zokhuseleko omele uzikhumbule ngoxa ubuka iindwendwe, sifuna ukuphawula izinto onokuzenza zokunceda ekuqinisekiseni ukhuseleko kumsi otyhefayo nakumlilo.

1. Ufake iialam zomsi otyhefayo.
2. Lungisa indlu yakho ukuze uphawule ukuba unealam yomsi otyhefayo okanye ukuba awuyidingi kuba indawo yakho ayinazo izixhobo ezisebenzisa amafutha okanye ezinye izinto ezinokuba yingozi.

Nazi izinto ekufuneka uzazi ngokuzikhusela kumsi otyhefayo nendlela yokuchazela iindwendwe ngezinto ozenzileyo ukuze uwuve umoya otyhefayo kwindawo yakho.

Umsi otyhefayo awunambala, awunavumba ibe uyigesi eyityhefu. Unokwenziwa zizixhobo ezisetyenziswa ekhayeni eziqhelekileyo njengeendawo zokubasa, izitovu okanye izinto zokufudumeza amanzi, ngoko kubalulekile ukuba bonke Ababuki Zindwendwe bawuqonde umngcipheko wokutyhefwa ngumsi onetyhefu.

Xa kufundwe kakuhle kwaza kwathathwa amanyathelo alula okuzikhusela, iingozi ezinento yokwenza nomsi otyhefayo zinokuphetshwa. Ufanele ufake iialam zomsi otyhefayo ukuba indawo yakho inazo naziphi na kwezi zinto zilandelayo:*

• Izixhobo (ngokomzekelo: isitovu, ioveni okanye umatshini wokomisa impahla) ezisebenzisa naluphi na uhlobo lwezi zinto:
  • Amalahle
  • Iinkuni
  • Igesi
  • Ipetroli
  • Igesi yendalo
  • Iparafini
  • Ioyile
  • I-methane
• Indawo yokubasa esebenzisa iinkuni
• Igaraji ethe nca
• I-generator ekufutshane neendawo zokuvula amacango okanye iifestile
• Iindawo zokoja zegesi okanye ezamalahle ezikufutshane nomphandle wefestile

Kubalulekile ukuphawula ukuba iialam zomsi azisebenzi njengeealam zomsi otyhefayo, nezomsi otyhefayo azisebenzi njengezomsi. Kodwa ke, iialam ezenza umsebenzi weyomsi neyomsi otyhefayo zifumaneka lula. Ukufaka ialam yomsi elumkisa nangomsi otyhefayo kulula ibe kunokusindisa ubomi.

Ngaphezu koko, kunokunceda ukwenza uludwe lwezinto ezimele zenziwe ukuze uhlale usenza zonke izinto ezifunekayo zokhuseleko.

Nanga amanyathelo onokuwalandela ukuze uphephe iingozi ezinento yokwenza nomsi otyhefayo:

1. Faka ialam yomsi otyhefayo esebenzayo kwindawo yakho. Iingcali ezifana neInternational Fire Chief Association neNational Fire Protection Association zicebisa ukufaka enye kumgangatho ngamnye nangaphandle kwegumbi lokulala ngalinye ukuze uqinisekise ukuba iindwendwe zinokuyiva ialam naxa zilele.
2. Vavanya iialam zakho nyanga nganye ukuze uqinisekise ukuba ziyasebenza. Iibhetri kufuneka zitshintshwe qho emva konyaka omnye, emihlanu okanye elishumi ngokuxhomekeke kwicebiso labenzi bayo, ngoko hlola usuku eyenziwe ngalo emva kwealam nakwisikhokelo somnikazi wayo ukuze wazi ukuba kucetyiswa ntoni.
3. Qinisekisa ukuba zonke izixhobo kwindawo yakho zifakwe ngokwemiyalelo yomenzi wazo neekhowudi zokwakha zasekuhlaleni. Phawula ukuba izixhobo ezininzi ezisebenzisa amafutha zifanele zifakwe zingcali.
4. Naziphi na izixhobo ezisebenzisa amafutha—njengeendawo zokubasa, izitovu, oomatshini bokomisa impahla nazo naziphi na iindawo zokukhupha umsi okanye ukungenisa umoya—zifanele zicocwe zize zihlolwe qho. Le nto iqinisekisa ukuba zisebenza kakuhle, zingena umoya owaneleyo ibe azifakwanga ngendlela engachananga, azinazintanda, umhlwa okanye amabala.
5. Qinisekisa ukuba uvula ngokupheleleyo indawo yokukhupha umsi xa usebenzisa indawo yokubasa okanye esinye isixhobo sokufudumeza esisebenzisa iinkuni. Ungayivali ude umlilo ucime ngokupheleleyo.
6. Qinisekisa ukuba iindawo zokukhupha umsi ezisetyenziswa zizixhobo—njengezinto zokufudumeza amanzi, izitovu noomatshini bokomisa impahla—zihlala zivuliwe ibe kungekho nto ixingileyo kuzo.
7. Yiba nemiyalelo ecacileyo yeendwendwe ukuba unezinto ezifana ne-generator, izixhobo zokoja okanye izinto zokufudumeza amanzi ukuze uqinisekise ukuba zonke zigcinwa kumgama okhuselekileyo ukusuka kwiifestile ezivuliweyo.
8. Nika iindwendwe iinombolo zefowuni zesebe lomlilo lasekuhlaleni, isebe lamapolisa, nezibhedlele ezikufuphi xa kunokuvela imeko yongxamiseko.

Ukuze ufumane iinkcukacha ezingakumbi ngozikhusela kumsi otyhefayo, ungafunda izinto ezifundisayo ezivela kwi-International Association of Fire Chiefs kunye neNational Fire Protection Association.

Ukuchaza ukuba unealam yomsi otyhefayo neyomsi kwindlu yakho kunceda ukuqinisekisa iindwendwe ukuba uyikhathalele impilo yazo.

Ungalungisa ezi nkcukacha ngokwehla uye kwindawo yezixhobo Zokhuseleko kwicandelo lokukhusela Iindwendwe kwindlu yakho. Ukuba indawo yakho ayidingi alam yomsi otyhefayo kuba ingenazo izixhobo ezisebenzisa amafutha okanye ezinye izinto ezenza umngcipheko, kukho ibhokisi onokuyiphawula kuyo loo nto.

Iindwendwe zingahluza izindlu ezinealam yomsi otyhefayo nezomsi, ngoko ukugcina iinkcukacha zokhuseleko zendlu yakho zisexesheni kunokukunceda utsale iindwendwe ezingakumbi. Ukuba awunayo ialam yomsi okanye eyomsi otyhefayo, loo nto iza kuphawulwa ngokucacileyo kwiphepha lendlu yakho nakwii-imeyile eziya kwiindwendwe ngaphambi kokuhlala kwazo.

Kubalulekile ukuqinisekisa ukuba imitha yegesi yekhaya ayinalo ikhephu okanye umkhenkce. Izixhobo zegesi zidinga umoya owaneleyo ukuze umlilo uvuthe ngaphandle kokwenza ingozi ibe zidinga ukuba izixhobo zifakwe imibhobho ekhupha umsi.

Umkhenkce nekhephu zingoyonakalisa imitha okanye imibhobho ehambisa umoya, nto leyo enokubangela ukuvuza kwegesi. Nanga amacebiso avela kwiUS National Fire Protection Association ngendlela yokuthintela imeko enobungozi:

• Sebenzisa umtshayelo endaweni yomhlakulo ukuze ususe umkhenkce nekhephu kwimitha yegesi.

• Ungayikhabi okanye uyibethe imitha yegesi ukuze ususe umkhenkce nekhephu.

• Xa usebenzisa umatshini wokuvuthela ikhephu, qinisekisa ukuba ikhephu ulisusela kude nemitha yegesi.

• Qinisekisa ukuba indlela eya kwimitha yegesi ayixinananga ukwenzala xa umntu oncedisa kwiimeko zongxamiseko efuna ukuya kuyo.

• Ukuba imitha igcwele umkhenkce ibe awukwazi ukuwususa, chazela inkampani ethengisa igesi ngokukhawuleza.*

Ungaqhakamshelana nenkampani ethengisa igesi ukuze ubuze malunga nesixhobo esisusa umkhenkce kwimitha yegesi, nto leyo ezinye iinkampani eziyithengisayo zize ziyifakele.

*Olu ludwe lusisikhokelo ibe alunayo yonke into. Nceda ucinge ngazo zonke izinto ezikhethekileyo ngendlu yakho uze uhlole imithetho yengingqi yakho neengcali zomlilo

Inkcazelo ekweli nqaku isenokuba itshintshile emva kokuba lipapashiwe.