Ezi nyanga zimbalwa zidlulileyo bezimbi nyhani kuthi sonke. Njengabaninzi kuni, ndivuka zonke iintsuku ndikude nezihlobo nabantu endisebenza nabo, ndicinga ukuba kazi yintoni elandelayo. Njengoko ndibukela iindaba mihla le, ndiwavela kabuhlungu amazwe, uluntu, kunye neentsapho ezithwaxwe kakhulu yile ntlekele.

Kuyo yonke le nto, neshishini lokuhamba kwihlabathi liphela lime ngxi. Iinqwelo-moya azihambi nemida yamazwe ivaliwe. Uninzi lwethu—kuquka iindwendwe zethu—zikwi-lockdwon njengoko ecebisile urhulumente, asikwazi kuhamba sishiye amakhaya ethu. Phantse akukwazeki ukuhamba.

Nge-11 kaMatshi, xa uMbutho wezeMpilo weHlabathi wathi kukho ubhubhane, sajongana nengxaki. Ukuba sivumela iindwendwe ukuba zirhoxise kwaye zibuyiselwe imali yazo yonke, besisazi ukuba loo nto inganeziphumo ezibi kwindlela ophila ngayo. Kodwa, besingenakwazi ukwenza iindwendwe nababuki zindwendwe bazive benyanzelekile ukuba bazibeke kwiimeko ezingakhuselekanga size senze kubekho ingozi yezempilo engakumbi. Sibone kunyanzelekile ukuba sivumele iindwendwe zirhoxe zize zibuyiselwe yonke imali yazo—kuquka nemali ebizwa sithi. Nceda wazi ukuba esi sigqibo asinanto yakwenza nokushishina kodwa senzelwe ukuze kukhuselwe impilo yoluntu.

Nangona kunjalo, nakuba ndikholelwa ukuba senze into elungileyo ngokubeka phambili impilo nokhuseleko, ndiyaxolisa kuba sisixelele iindwendwe esi sigqibo singakhange siqale sithethe nani—njengokuba abantu abasebenzisanayo bemele benjenjalo. Sinivile kwaye siyazi ukuba besinokusebenzisana bhethele.

Nangona isenokuba akukhangeleki njalo, siyasebenzisana. Xa ishishini lakho lingaqhubi kakuhle, nelethu ishishini aliqhubi kakuhle. Siyazi ukuba ngoku uninzi lwenu lutsala nzima, ibe lufuna ukuncedwa ngezenzo hayi ngomlomo.

Nazi ezinye zezinto esizenzayo ukukunceda umelane nale ngxaki.

Siza kubhatala ababuki zindwendwe i$250 miliyoni ukuze sibancede bahlangabenzane neendleko zokurhoxiswa kokubhukishwa ngenxa yeCOVID-19. Xa undwendwe lurhoxisa ukubhukisha indawo yokuhlala ngenxa yemeko enxulumene neCOVID-19, lube beluza kungena nanini na ukususela ngoMatshi 14 ukuya ngoMeyi 31, siza kukubhatala i-25% yemali obuza kuyifumana kwipolisi yakho yokurhoxa. Le nto isebenza kuko konke ukurhoxiswa kokubhukiswa okusele kwenziwe ngenxa ye-COVID-19 ngeli xesha. Eli xabiso liza kubhatalwa lonke nguAirbnb. Siza kuqalisa ukubhatala ngoAprili. Iindwendwe ezibhukishe indawo ngoMatshi 14 okanye ngaphambi koko ziseza kukwazi ukurhoxa zize zibuyiselwe imali ngendlela eqhelekileyo okanye imali ezinokuyisebenzisa kuhambo eyi-100% yemali eziyibhataleyo. Ungaya ku-airbnb.com/250Msupport ukuze ufumane iinkcukacha ezingakumbi.

Senza iNgxowa-mali Yoncedo YeeSuperhost ye$10 miliyoni. Le nto yenzelwe iiSuperhost eziqeshisa ngendawo yazo ibe zifuna uncedo ekubhataleni irenti okanye imali-mboleko yendlu, nababuki zindwendwe Bezinto Ezinokonwatyelwa abasele benexesha elide bezenza, abatsala nzima. Abasebenzi bethu baqale le ngxowa-mali ngokukhupha ezipokothweni zabo i$1 miliyoni, kwaye mna noJoe, noNate siye safaka isandla ngokukhupha kuthi enye le i$9 miliyoni. Ukuqala ngoAprili, ababuki zindwendwe bangaqala ukufaka izicelo zemali efikelela kwi$5 000 ekungafuneki bayibuyise. Ungaya ku-airbnb.com/superhostrelief ukuze ufumane iinkcukacha ezingakumbi.

Senza kube lula ukuba iindwendwe zakho zangaphambili zikuxhase ngokuthumela imali ngqo kuwe. Iindwendwe ezininzi ziye zasixelela ukuba ziyixabisa kakhulu into yokuba ababuki zindwendwe bakwa-Airbnb behambelana neemeko ibe zifuna ukunixhasa ngokunithumelela imali. Senza indlela yokuba iindwendwe zikwazi ukuthumela umyalezo nemali nakowuphi na umbuki zindwendwe ezakhe zahlala naye ngaphambili. Silindele ukuba le nto iqale ukusebenza ngoAprili. Siyazi ukuba nokuba into incinci, inceda kakhulu ngeli xesha lobunzima.

Sisebenzisene ukuze senze ababuki zindwendwe bethu bakwazi ukufumana inkxaso kulo mthetho umtsha Wokuvuselela Uqoqosho karhulumente waseMerika weCOVID-19. Lo mthetho ngoku uvumela ababuki zindwendwe baseMerika basebenzise iindlela ezininzi zoncedo, eziquka imali enikwa amashishini amancinci, imali-mboleko yamashishini amancinci, kunye noncedo ngexesha ongasebenzi ngalo. Enkosi kakhulu ngokufowuna kwabantu nangeeimeyile ezingaphezu kwe-105 000 eziya kumalungu eCongress.

Nathi sisebenzela kwizinto abathe baza kuzenza kwaye siza kuninika iinkcukacha ezingakumbi kwezi veki zizayo. Ezi zinto ziquka ukusebenza ngenkuthalo neengcali kunye nabantu abajongene nomgangatho wococeko ukuze wena neendwendwe zakho nikhuseleke, bekwajongene neinshorensi yokuhamba yakho neyeendwendwe zakho, kunye neenkqubo zokufuna abathengi ukunceda ukwakha ishishini lakho.

Ndizinikele ekubeni sisebenzisane kakuhle kwakhona. Xa sisebenza kunye, somelela kakhulu ibe senza okona kona. Ndibone umzekelo wale nto usenzeka kutshanje kwimizamo yethu xa sisonke yokufunela iindawo yokuhlala abezempilo abatshotsha phambili ekulweni le meko. Sisonke sinceda ekufumaneleni abezempilo, abasebenzi boncedo kunye nababengabokuqala ukuncedisa ekulweni le meko abangaphezu kwe-100 000 indawo yokuhlala yasimahla okanye kubekho imadlala abancediswa ngayo. Bangaphezu kwe-40 000 kuni abasele bethe bafuna ukunceda. Yiya ku-airbnb.com/covid19relief ukuze nawe ubajoyine.

Ukuthembana sisiseko sobambiswano, kwaye kuya kusibakho ngokuhamba kwexesha. Siyazi ukuba sisenomsebenzi wokunenza nisithembe ngakumbi, kodwa yeyona nto iphambili kuthi ibe sizimisele ukuyenza. Xa imeko kwezohambo ibuyele esiqhelweni—ibe iza kubuyela—sijonge phambili ekwamkeleni iimiliyoni zendwendwe kunye kwakhona.