Amacebiso okucoca avela Kubabuki Zindwendwe abanamava
Indawo ecocekileyo inokukhokelela kwizimvo ezintle kakhulu. Kodwa ukungacoceki sesinye sezizathu eziphambili zokuba kubekho uluvo olubi, ngokutsho kwenkcazelo ka-Airbnb. Zama la macebiso avela Kubabuki Zindwendwe abanamava ukuze indawo yakho ihlale icoceke ngeyona ndlela.
Ukwenza indlela yokucoca
Enoba uyazicocela okanye uqesha abantu abacocayo, kubalulekile ukuba indawo yakho icocwe kakuhle emva kokuphuma kondwendwe ngalunye, sihlandlo ngasinye.
UJuliette, ilungu leQumrhu Labacebisi Lababuki Zindwendwe eNairobi, eKenya, uthi: “Kubalulekile ukuba uhlale usenza izinto ngendlela efanayo uze ube noludwe lwezinto ekufuneka ube uyazenza lwabantu abacocayo.” “Luyabanceda, kuba lubenza baqhele. Ukucoca indlu ngendlela efanelekileyo kuyasebenza nyhani.”
Ukuba uqesha umntu ococayo, yijonge ngokwakho inkqubo yokucoca, ukuze wazi kakuhle ukuba yintoni ekufuneka yenziwe nokuba yintoni omele uyiquke kuludwe lwezinto ekufuneka ube uyazenza. Qiniseka ukuba ucwangcisa ixesha elaneleyo ngaphambi kokuba kungene umntu olandelayo ukuze ucocisise, uze ukhangele umntu ococayo wesibini okanye wenze icebo lesibini usenzela ukuba kunokwenzeka umntu ococayo angakwazi ukufika ngenye imini.
Ukucocela iindwendwe kufuna uhoye ngakumbi xa ucoca kunokuba ubunokwenza xa ucocela isiqu sakho. Cinga ngokucoca ugutyule ngamaxesha athile ukuze wenze imisebenzi yesiqhelo emva kokukuphuma komntu ingabikho nzima kangako kwaye ibe lula ngakumbi.
Ukuqala ngezinto ezisiseko
UJuliette ugxininisa ukubaluleka kokujolisa kwiindawo ezithile xa ucoca.
- Qala ngeendawo ekuhanjwa kuzo kakhulu. UJuliette uthi, “Ikhitshi namagumbi okuhlambela abaluleke kakhulu, kuba zezona ndawo zisetyenziswa kakhulu.” Emva kokuba amagumbi okuhlambela ecocekile, uya ekhitshini, apho abacoci bakhe bazihlambela khona zonke izitya. Uthi, “Siyalicocisisa ngeyona ndlela.”
- Emva koko: ngamagumbi okulala. Abantu abacocela uJuliette bavula iidrowa, bajonge phantsi kweebhedi, baze baqinisekise ukuba akukho ndawo iphoswayo. Uthi, “Emva koko sisusa yonke into ezibhedini, sivule kubethe umoya indlu yonke, sizivule ngokupheleleyo iifestile, sihlambe izinto zokondlula ibhedi.”
- Ekugqibeleni, silungisa iibhedi. Indlela kaJuliette yokwenza izinto? Uthi: “Oomatrasi banezinto zokubakhusela, imiqamelo inezinto zokuyikhusela ibe siyazitshintsha xa zizonke.”
Ukuhoya kakhulu nezona zinto zincinci
Cinga njengondwendwe. Ngokomzekelo, uTammi, Umbuki Zindwendwe waseSeattle, uthi: “Ikhethini yeshawa ihlala ilityalwa. Eyam ngeyeplastiki, kwaye ndiyayitshiza ndize ndiyosule qho emva kondwendwe ngalunye. Kwakhona ndiyitshintsha qho emva kwenyanga okanye ezimbini.”
Ngokufanayo, ungaziphosi iindawo ezibanjwa kakhulu njengeendawo zokucima izibane. Umbuki Zindwendwe uAdam waseAtlanta uthi: “Ezo zinto zinokuba mdaka, kodwa awuziqapheli kuba uziqhelile.” “Ukuhlikihla ngentwana yotywala kunokuyilungisa loo nto.”
Phepha imeko emincisayo
Iindwendwe azikuthandi ukubona iinwele zomnye umntu kwindawo yazo. USue noJohn, Ababuki Zindwendwe baseSalt Lake City, banecebiso lokulungisa ingxaki yenwele eziwe phantsi: bathi, “Emva kokuba ndihlambe zonke izinto zokondlula ibhedi, ndisebenzisa i-lint roller emashitini, kwimiqamelo nakwiingubo.”
ULaura, Umbuki Zindwendwe eCottonwood, eArizona, ucebisa ukuba kutshintshwe imophu. Uthi, “Coca imigangatho yegumbi lokuhlambela uguqe ngamadolo,” usebenzisa ibhrashi yokukhuhla okanye ilaphu lemaykrofayibha. “Kuyakhawuleza ibe kulula, kwaye awuzukuphosa naziphi na iinwele.” Ungalibali nokucoca igumbi lokuhlambela emva kokuphuma kondwendwe ngalunye.
Ukuzama amacebiso abanye Ababuki Zindwendwe
Nazi ezinye izinto ezingokucoca ezikhuthazwa Ngababuki Zindwendwe abanamava:
- Qala ngokufaka iimpahla kumatshini wokuhlamba iimpahla. UEmma-Kate waseSan Francisco uthi, “Into yokuqala endiyenzayo kukuthatha zonke izinto zebhedi neetawuli ndize ndizifake ematshinini wokuhlamba iimpahla, ukuze zikhabe zivaseka ngoxa ndicoca ezinye iindawo. Kundongela ixesha.”
- Polisha imigangatho yeplanga. UTammi waseSeattle uthi, “Ndinemigangatho yeplanga. Ndihlala ndiyipolisha qho ukuze xa iindwendwe zingena zibone umphantsi oshayinayo. Yenza kubonakale ngathi kucoceke yonke indawo nto leyo ekhuthazayo.”
- Songa iphepha lasethoyilethi. UEmma-Kate uthi, “Ndiyalisonga apha ezantsi iphepha langasese. Yinto encinci, kodwa yenza libe ngathi litsha kwaye kubonisa ukuba uyakhathala.”
- Gcwalisa isepha yezandla neebhotile zeshampu. UAlex eSan Francisco uthi, “Kumnandi ukuba nezinto ezisetyenziswa kwigumbi lokuhlamba ezingathi zintsha. Ibhotile egcweleyo nevaliweyo yenza iindwendwe zizive ngathi zezokuqala ukuyisebenzisa.”