Lo mxholo awufumaneki ngolwimi olukhethileyo, ngoko siwenze wafumaneka ngolona lwimi esinalo olusondeleyo kolwakho.

Iindlela ezilula zokonwabisa iindwendwe xa ziza kuhlala ixesha elide

Sebenzisa la macebiso ukuze uvise iindwendwe zakho kamnandi uze ube nefuthe nakwizimvo.
Ngu-Airbnb nge-28 Feb 2023
Lifundeka ngemizuzu eyi-2
Ihlaziywe nge-28 Feb 2023

Iindwendwe ezihlala kwakho iintsuku eziyi-28 nangaphezulu zidla ngokudinga izinto ezahlukileyo kwiindwendwe zempela-veki. Ukuzinika ezo zinto zizifunayo kwenza zibe nohambo olumnandi—ibe kunokukhokelela ekubhalweni kwezimvo zeenkwenkwezi ezintlanu ezingakumbi.

Ukuze uzanelise iindwendwe zakho ezihlala ixesha elingangenyanga, zama ezi zinto zilula emva kweveki zifikile.

Ukubuza iindwendwe ukuba zidinga ntoni

Inyanga lixesha elide lokuhamba ngaphandle kwento oyisebenzisa rhoqo ekhaya ongakwazanga ukuyipakisha. Njengombuki Zindwendwe, unokubuza iindwendwe zakho ukuba zikhona na izinto ezizidingayo ezingenazo.

Mhlawumbi zingathanda umqamelo owongezelelekileyo okanye ingubo, iambrela okanye izinto zasekhitshini, ezifana nethowusta okanye i-blender. Ukufuna kwakho ukunikezela ngezi zinto zincinci kunokwenza umahluko omkhulu kwinqanaba lazo lokuthi zava ibe uza kukwazi ukunika iindwendwe zexesha elizayo into efanayo.

UAndrea, iSuperhost eLeavenworth, eWashington, uthi uyakuthanda ukugcina ikhitshi linezinto ezaneleyo xa kuza kuhlalwa ixesha elide. “Iindwendwe zam ndisoloko ndizinika amagqabi eti amaninzi, ikofu, izinto ezahlukahlukeneyo zokwenza ikofu, ioyile nezinto zokunonga.”

Ukuzixelela ukuba ungalungiselela ukuba zicocelwe embindini wexesha lokuhlala kwazo

Iindwendwe ezininzi ziyakuthanda ukucocelwa embindini wexesha lokuhlala kwazo. Zincedakala kakhulu, ibe loo nto ikunika ithuba lokulungisa izinto ezimbalwa, njengokufaka amabhetri amatsha, iiglobhu nezihluzi.

UAnnette, iSuperhost yaseSan Francisco, uthanda ukuthi kwiindwendwe: “Kuba uza kuhlala apha ubuncinane inyanga, akhona amathuba okuba ingakhona into ekuza kufuneka siyihoye. Ndicela uncede ungazami ukulungisa izinto ngokwakho, nokuba yinto encinci kangakanani. Qhakamshelana nathi kwangoko ibe siza kuyihoya.”

Xa ulungiselela ukucoca embindini wexesha lokuhlala kweendwendwe, yinto entle ukuchazela iindwendwe ukuba ngubani kanye kanye oza kungena kule ndawo, ixesha aza kuqalisa ngalo, nokuba uza kuthatha ixesha elingakanani kuyo. Ukuchaza izinto ezinokulindelwa kubonisa ukuba uyazihlonipha izinto zazo eziyimfihlo nokhuseleko lwazo.

Unganako nokunikezela ngeenkonzo izihlandlo ezingakumbi zize zibhatalelwe, nto leyo enokunceda abantu abakucocelayo ize igcine indawo yakho icocekile.

Ukucebisa ngeenkonzo zasekuhlaleni

Iindwendwe zidla ngokungayazi indawo yakho njengawe. Ukuzithumelela amacebiso asekuhlaleni ngomyalezo okanye incwadi ebonisa iindawo kunokuzinceda zonwabele izinto ezininzi kutyelelo lwazo.

Yenza uludwe olufutshane, ucinge ngeenkonzo iindwendwe ezinokuzidinga xa ziza kuhlala ixesha elide, ezinjengokuhanjiswa kwezinja, ukuziswa kokutya okanye ukulungiswa kwelaptop. Ukucebisa ngoosomashishini basekuhlaleni kunokukunceda wenze ubuhlobo neendwendwe zakho ngoxa uxhasa abantu bengingqi yakho.

Xelela iindwendwe ngeendawo ozithandayo, ingakumbi iindawo ezingaziwayo kangako ezingamele ziziphose. Ungalibali ukukhankanya imithendeleko okanye amanye amatheko amakhulu kawonke-wonke enzeka ngexesha lokuhlala kwazo.

Ukwenza izinto ezikhethekileyo

Izinto ezikhethekileyo zidla ngokwenza iindwendwe zizive zithandwa. Unokushiya ikhadi emnyango uze ubhale amazwi ambalwa okubulela (“Enkosi ngokuhlala nathi”) nesipho esicingisisiweyo:

  • Ibhotile yewayini yengingqi
  • Ilofu yesonka esandul 'ukubhakwa
  • Isikhumbuzo esivela kule ndawo

UDonna, iSuperhost yaseSan Francisco uthi, “Sithandeka ngakumbi xa sisincinci kwaye singasindi.” “Mna ndithanda into etyiwayo ukuze ziyitye kwangoko ukuba ziyafuna.” Izinto ezenziwe ekuhlaleni zinokuzonwabisa iindwendwe ngalo mzuzu zize zibuyise iinkumbulo ezimnandi ngendawo yakho emva kokuba ziphumile.

Inkcazelo ekweli nqaku isenokuba itshintshile emva kokuba lipapashiwe.
Airbnb
28 Feb 2023
Ngaba oku bekuluncedo?